Баткенде шайлоо мыйзамына кирген өзгөртүүлөр боюнча түшүндүрүү иштери жүрүүдө

Шайлоо жана референдум өткөрүү боюнча борбордук комиссиясы жана президенттин Баткен облусундагы ыйгарым укуктуу өкүлүнүн аппараты конституциялык мыйзамга киргизилген өзгөртүүлөр боюнча түшүндүрүү иштерин жүргүзүүдө.

Маалым болгондой, бүгүн, 23-сентябрда Баткен шаарында өткөн жыйынга президенттин Баткен облусундагы ыйгарым укуктуу өкүлү Айбек Шаменов, Шайлоо жана референдум өткөрүү боюнча борбордук комиссиясынын өкүлү Мейкинбек Абдалиев, район, шаар башчылары, жергиликтүү өз алдынча башкаруу органдарынын жетекчилери катышты.

Жолугушуунун жүрүшүндө шайлоо мыйзамдарындагы өзгөртүүлөр, добуш берүү тартиби кеңири түшүндүрүлдү.

Белгилей кетсек, калк арасында көп мандаттуу шайлоо округунда добуш берүүдө шайлоочу шайлоо бюллетенине үч талапкерге чейин добуш бере алат деген түшүнүк калыптанган. Бирок конституциялык мыйзамдын 31-беренесинин 8-бөлүгүнө ылайык, Жогорку Кеңештин депутаттарын көп мандаттуу шайлоо округу боюнча шайлоодо шайлоо бюллетенине өзү тандаган бир гана талапкерге белги коёт, же болбосо “Баарына каршы” позициясына белги коёт деп так белгиленген.