Таласта мамлекетке миллиондогон сом зыян келтирилген мыйзам бузуулар аныкталды

Таластын Манас жана Айтматов райондорунда мыйзам бузуулардан улам мамлекетке 32 миллион сомдон ашуун экологиялык зыян келтирилгендиги аныкталды. Бул тууралуу Башкы прокуратура билдирди.

Маалыматка ылайык, Манас районунда 2021-жылы райондук мамлекеттик администрациянын жер комиссиясы тарабынан Бакай-Ата токой чарбасынын Чоң-Капка токойчулугунан кум-шагыл алуу үчүн жеке ишкерге уруксат берилген. Көзөмөлдүн жоктугунан 7,95 гектар токой жеринин катмары бузулуп, мамлекетке 32 миллион сомдон ашык экологиялык зыян келтирилген.

Ал эми Айтматов районунун Аманбаев айыл аймагына караштуу Сатыкей айылындагы жайыт жерлерден мыйзамсыз кум-шагыл казылып, 1,081 гектар жер кыртышы бузулган. Натыйжада мамлекетке 1 миллион 245 миң сом экологиялык зыян келтирилген.

Аталган фактылар боюнча кылмыш иштери козголуп, учурда тергөө иштери жүрүүдө.