Гонконг күчтүү тайфундан кийин калыбына келүүдө

Гонконгду быйыл дүйнөдөгү эң күчтүү "Рагаса" тайфуну каптап өткөндөн кийин шаар акырындык менен өз калыбына келе баштады. 36 саатка токтоп турган эл аралык аэропорт кайра иштей баштады, ишканалар, транспорт жана айрым мектептер ачылды. Бул тууралуу чет өлкөлүк басылмалар жазышты.

Маалыматтарга караганда, шаарда 100дөн ашык киши жаракат алган. Тайфун болгон күнү бийлик эң жогорку - 10-деңгээлдеги эскертүүнү берип, кийинки күнү 3-деңгээлди сактап калды. Чоң толкундар Гонконгдун жээктерин каптап, сел жүрүп, жолдор менен үйлөрдү суу басты.

Азыр бийлик жолдорду оңдоп, 1000ден ашык кулаган даракты тазалап, 85ке жакын суу каптоо фактысына чара көрүп жатат. "Рагаса" болор алдында бийлик төмөн жерлерде жашаган адамдарга үйлөрүн бекемдөө үчүн кум каптарды таратып, эл азык-түлүктү камдап алган.