Юстиция министирлиги аралыктан нотариалдык кызмат көрсөтө баштайт

1-октябрдан тартып Кыргызстанда нотариалдык кызмат көрсөтүүнүн жаңы форматы иштей баштайт, айрым нотариалдык аракеттерди алыстан аткаруу мүмкүнчүлүгү пайда болот. Бул тууралуу Юстиция министрлигинен билдиришти.

Маалым болгондой, эми жарандар жана юридикалык жактар нотариуска жеке барбастан, төмөнкү процедураларды онлайн тартипте аткара алышат:

• ата-энелердин макулдугун күбөлөндүрүү;

• ата-энелердин, асырап алуучулардын, камкорчулардын жеке көзөмөлчүлөрдүн жашы жете электерди Кыргызстандын чегинен чыгарып кетүүгө макулдугун күбөлөндүрүү;

• жашаган жери боюнча каттоого макулдукту күбөлөндүрүү;

• паспорт алууга макулдукту күбөлөндүрүү;

• Кыргызстандын жарандыгын алуу же андан чыгууга макулдукту күбөлөндүрүү;

• Мамлекеттик каттоо кызматынын алдындагы транспорт каражаттарын жана айдоочуларды каттоо агенттигинен маалымкаттар менен документтерди алуу үчүн ишеним катты күбөлөндүрүү (четтетүү укугусуз);

• Мамлекеттик бажы кызматында жүктөрдү бажыдан өткөрүү үчүн ишеним катты күбөлөндүрүү (четтетүү укугусуз).

Кызматтар өлкөнүн ичинде гана эмес, чет өлкөдө жүргөн кыргызстандыктар үчүн да жеткиликтүү болот.