Жазуучу Өмүрбек Караевдин жаңы китептеринин бет ачары болду 

Кечээ, 24-сентябрда жазуучу, публицист жана коомдук ишмер Өмүрбек Караевдин жаңы чыгармаларынын бет ачары болду. Иш-чарага маданият, маалымат жана жаштар саясаты министринин орун басары Аскаралы Мадаминов, адабият ышкыбоздору, окурмандар жана коомдук ишмерлер катышты. Бул тууралуу Маданият, маалымат жана жаштар саясаты министрлигинен билдиришти.

Аскаралы Мадаминов авторду эки жаңы китеби - “Повести моей юности” жана “Wild pear” бет ачары менен куттуктады.

“Жазуучунун чыгармалары эл аралык деңгээлде да жогору бааланып, бир нече чет тилдерге которулган. Айрыкча Мюнхендеги эл аралык китеп көргөзмөсүндө көрсөтүлүшү - анын чыгармачылыгы дүйнөлүк маданий мейкиндикте да таанылгандыгынын айкын далили”,- деп билдирди министрдин орун басары.

Аталган чыгармаларда улуттук өзгөчөлүк, адам менен табияттын байланышы, ак ниеттик менен жамандык ортосундагы күрөш көркөм чагылдырылып, замандын руху жана адам тагдыры терең сүрөттөлгөнү айтылды.