Казакстанга белгилүү актёр Жеки Чан келди (видео)

23-сентябрда Казакстандын Алматы аэропортунан дүйнөгө белгилүү актёр Жеки Чан байкалган. 71 жаштагы киножылдыздын учактан түшүп жатканы видеого тартылып, бул социалдык тармактарга тез эле тарап кеткен.

Айрым маалымат булактарына ылайык, Жеки Чанды тосуп алууга казакстандык Salem Entertainment медиакомпаниясынын өкүлдөрү келишкен. Бул компания "5:32", "Кара короо" жана "Шекер" сыяктуу сериалдары менен таанылган.

Расмий түрдө анын сапарынын максаты азырынча ачык айтылган жок. Бирок кино жаатындагы эксперт Карим Кадырбаев жакында Жеки Чан катыша турган жаңы долбоор тууралуу кеңири маалымат берерин билдирди.

Социалдык тармактарда анын келишине байланыштуу ар кандай божомолдор айтылууда. Чан жаңы тасманын же Salem Entertainment менен биргелешкен долбоорго катышуу максатында келген болушу мүмкүн. Же кытайлык актёр "Кайрат" клубу менен "Реал Мадриддин" футболдук беттешине атайын конок катары чакырылган болушу ыктымал.

Бирок азырынча бул маалыматты компаниянын да, футболдук клубдун да өкүлдөрү расмий түрдө тастыкташа элек.