Бишкекте белгисиз адамдар тарабынан төрт музыкант сабалды

Бишкекте белгисиз адамдар тарабынан төрт музыкант сабалды. Бул тууралуу бүгүн, 25-сентябрда SUPER.KG порталына жабыркагандардын жакындары кабарлашты.

Маалым болгондой, окуя 20-сентябрь күнү болжол менен 23:30 чамасында Бөкөнбаев жана Исанов көчөлөрүнүн кесилишинде болгон. Анда белгисиз адамдар төрт музыкантты катуу сабаган. Ур-токмокко алгандардын бири бычак көтөрүп жүргөн.

Жаңжал машинаны катуу айдап, тургундардын тынчтыгын бузгандыгы үчүн эскертүү бергенден келип чыккан. Учурда жабырлануучулардын бири оор абалда ооруканада экени айтылды.

Ал эми музыканттарга кол салгандар окуя болгон жерден качып кетишкен.

Жабыркагандардын туугандары окуя боюнча арыз жазганын маалымдашты. Окуя болгон жерге милиция кызматкерлери да чакырылган.

Бул боюнча Биринчи Май райондук ички иштер башкармалыгына кайрылганыбызда төмөнкүлөргө токтолду:

"Аталган факт Бишкек шаарынын Биринчи Рай РИИБи тарабынан каттоого алынып, тергөөгө чейинки текшерүү иштери башталган. Жабырлануучу тараптарга соттук-медициналык экспертизалар дайындалган. Азыркы учурда корутундусу күтүлүүдө, жыйынтыгы менен тийиштүү юридикалык баа берилет".

Ошондой эле мекеме окуяга тиешеси бар жарандардын өздүгүн аныктоого багытталган иштер жүргүзүлүп жатканын, жыйынтыгына жараша тийиштүү чара көрүлө турганын кошумчалады.