Барскоон–Бедел жолунда өлкөдөгү эң ири эки тоннелдин курулушу башталды

Кечээ, 27-сентябрда министрлер кабинетинин төрагасынын орун басары Бакыт Төрөбаев Ысык-Көлдөгү Барскоон–Бедел эл аралык унаа жолунда өлкөдөгү эң ири эки тоннелдин курулушунун башталышына старт берди. Бул тууралуу өкмөттүн маалымат кызматы билдирди.

Маалымдагандай, тоннелдер Сөөк жана Ашуу-Суу ашууларында салынат. Биринчисинин узундугу 5340 метрди, ал эми экинчисинин узундугу 3840 метрди түзөт. Бул өлкө тарыхындагы эң узун жана техникалык жактан татаал тоннелдерден болуп калмакчы.

"Жолдун жалпы узундугу болжол менен 150 чакырымды түзөт. Мындан тышкары аталган унаа жолдо көпүрөлөрдү, кар көчкүдөн сактоочу галереяларды, таш кулоо жана сел жүрүүдөн коргоочу тосмолорду куруу каралган. Бүгүнкү күнү курулуш иштерине 287 адис жана жол курууга багытталган 162 атайын техника жана жабдуулар тартылган. Ошондой эле куруучулар үчүн бардык шарттары каралган 4 лагерь курулду", - деп айтылат маалыматта.

Белгилей кетсек, 27-августта өлкө башчы Садыр Жапаров Барскоон–Бедел унаа жолунун курулушуна старт берген.