Орус министри БУУнун жыйынында Крым менен Донбасты Африкага салыштырды

Орусиянын тышкы иштер министри Сергей Лавров Нью-Йоркто БУУнун Башкы ассамблеясында Украинанын Москва басып алган аймактарын Африкага салыштырды.

Ал Киевди колонизаторлук саясат жүргүзгөн деп айыптаган.

"Крым менен Донбастын жашоочулары 2014-жылдан кийин Африка жана Азия элдери сыяктуу колонизаторлордун эзүүсүнөн жапа чекти. Алар АКШнын 1776-жылдагы эгемендүүлүк декларациясынын принциптеринин бирине ылайык көз карандысыздыкты жарыялоого укуктуу болгон", - деп келтиришет анын сөздөрүн чет элдик басылмалар.

Ошондой эле Лавров Орусия Украинадагы жаңжалды чечүү боюнча сүйлөшүүлөргө ачык экенин белгилеген.

"Орусиянын коопсуздугу жана анын маанилүү кызыкчылыктары ишенимдүү кепилдениши керек. Киевдин көзөмөлүндө калган аймактардагы орустардын жана орус тилдүүлөрдүн укуктары толугу менен калыбына келтирилиши керек. Мунун негизинде биз Украинанын коопсуздук кепилдигин талкуулоого даярбыз", - деп кошумчалаган ал.