Имамидин Ташов Бишкектеги СИЗО-1де ачкачылык жарыялады

Ишкер Имамидин Ташов СИЗО-1 администрациясынын кысымына нааразычылык билдирүү иретинде ачкачылык жарыялады. Бул тууралуу анын адвокаты Асел Аргымбаева социалдык тармактагы баракчасында билдирди.

Анын айтымында, Имамидин Ташов Башкы прокуратурага, акыйкатчы институтуна, УКМКга жана башка органдарга кармоо шарттарын бузуу боюнча арыз менен кайрылгандан кийин, ага карата куугунтук башталган.

"Менин коргоочумду алты кишиге ылайыкташтырылган 235-камерадан 18 туткунду, анын ичинде бир нече жолу киши өлтүргөнү үчүн соттолгондорду камтыган 218-камерага көчүрүштү. Анын жеке буюмдары алынып, туугандарына берилди",- деп жазды адвокаты.

Асел Аргымбаева мындай аракеттер "Камакта кармоо тартиби жана шарттары жөнүндө" мыйзамын бузат деп баса белгиледи.

Окуя боюнча СИЗО-1дин кызматкерлерине карата кылмыш ишин козгоо тууралуу арыз берилген. Асел Аргымбаева Имамидин Ташовдун ден соолугу азык-түлүктөн гана эмес, суудан да баш тарткандыктан кескин начарлап кетиши мүмкүн экенин белгилеп, кесепеттерин жаза өтөө системасынын жетекчилигине жүктөдү.

Эске салсак, Имамидин Ташов былтыр 22-апрелде Чүй облусунун Кайыңды айылында кармалган.