Чүй облустук музыкалык драма жана сатира театрына жаңы директор дайындалды  

Термечиков атындагы Чүй облустук музыкалык драма жана сатира театрынын директору болуп Замирбек Татиев дайындалды. Бул тууралуу Маданият, маалымат жана жаштар саясаты министрлигинен билдиришти.

Замирбек Татиев 1986-жылы туулган. Ал Маданият техникумун (2005-жылы) жана Бүбүсара Бейшеналиева атындагы Кыргыз мамлекеттик маданият жана искусство университетин (2021-жылы) аяктаган.

Кесиби боюнча музыка жана ыр мугалими, ошондой эле кинооператор адистигине ээ.

Замирбек Татиев маданият тармагында 20 жылга жакын үзүрлүү эмгектенип келет. Ал Байтемиров атындагы маданият ордосунда концертмейстер, фольклор тобунун жетекчиси, көркөм жетекчи, методист болуп иштеген. 2022-жылы аталган мекемеге директор болуп, андан кийин Токмок шаарынын маданият бөлүмүн жетектеген.

Министрлик жаңы дайындалган жетекчи театрдын чыгармачылык багытын өнүктүрүүгө, жаш таланттарды колдоого жана аймактагы маданий турмушту жандандырууга өз салымын кошо турганына ишеним артып жатканын кошумчалады.