КМШнын башкы катчысы: "Армениянын уюмдан чыгышы мүмкүн эмес"

КМШнын башкы катчысы Сергей Лебедев уюмга мүчө өлкөлөрдүн өз ишмердүүлүгүн токтотуу боюнча каалоосу жок экенин билдирди. Ал мындай пикирин Минскиде өткөн КМШ өкмөт башчылары кеңешинин жыйынында Армениянын видеоконференция аркылуу катышуусуна байланыштуу айтты.

"Армениянын вице-премьери Григорян онлайн катышып, жумушка байланыштуу маанилүү ой-пикирлерин билдирди. Армения көпчүлүк документтерди колдоду. Ошондуктан бизде Армения КМШ алкагындагы ишин токтотот деген күмөн жок", — деди Лебедев.

Ал белгилегендей, КМШнын тогуз өлкөсү жогорку деңгээлде жыйынга катышты. Бардык делегациялар уюмду сактап калуу маанилүү экенин белгилешти.

Жыйындын жүрүшүндө өлкөлөр КМШдагы экономикалык жана гуманитардык кызматташууну өнүктүрүүгө багытталган бир катар келишимдерге кол коюшту. Сергей Лебедевдин айтымында, алардын айрымдары 2035-жылга чейин күчүндө болот.

Эске сала кетсек, быйыл июлда Армениянын премьер-министри Никол Пашинян өлкө Евробиримдикке кошулууну каалап жатканын билдирген. Ал эми август айында Армения мындан ары Европа Биримдигине же Евразиялык экономикалык союзга (ЕАЭБ) мүчө болууну тандоого аргасыз болорун кошумчалаган.