Кудайберген Базарбаев 100 жаштагы Кайрыл Каратаевадан кабар алды

Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиктин директору Кудайберген Базарбаев бүгүн, 1-октябрь - Карылар күнүнө карата Баткен облусундагы 100 жаштагы Кайрыл Каратаевадан кабар алды. Бул тууралуу мекеменин басма сөз кызматы билдирди.

Маалыматка ылайык, Каратаева 13 (10 уул, 3 кыз) баланы тарбиялаган. Бүгүнкү күндө алардын артында 100гө жакын небере, 20га жакын чөбөрө жана 2 кыбырасы бар.

Ага белектер тапшырылып, жылуу пикирлер айтылды.

Базарбаев өз сөзүндө мамлекет тарабынан улгайган жарандарга ар тараптуу колдоо көрсөтүлүп, алардын социалдык абалын жакшыртуу жана татыктуу жашоо шарттарын камсыз кылуу дайыма көңүл чордонунда турарын баса белгиледи.

Ошондой эле агенттиктин жетекчиси облуска болгон иш сапарында жергиликтүү тургундар менен жолугушту.