Ошто кафе-ресторандарга унаа токтотуучу жайларды тез арада уюштуруу тапшырмасы берилди 

Ош шаарынын тургундарынын жана конокторунун коопсуздугун камсыз кылуу жана шаардагы жол тыгынын азайтуу максатында ар бир коомдук тамактануучу жайдын өзүнүн унаа токтотуучу жайы болушу керек. Бул тууралуу бүгүн, 1-октябрда мэриянын маалымат кзыматы билдирди.

Мындан улам кыска убакытта унаа токтотуучу жайларды уюштурууну колго алуу зарылчылыгы турат.

"Быйылкы жылы Ош шаарында бир топ жолдор оңдоп-түзөөдөн өткөрүлүп, кеңейтилген. Бирок жаңы жасалган жолдордун четтери унаа токтотуучу жай катары пайдаланылып, кайрадан эле жол кыймылына тоскоолдук жаратып жатат. Андыктан сиздерге келген кардарлардын унаалары жол тыгынын пайда кылып, башкаларга ыңгайсыздык жаратпашы керек. Шаарыбыздын кызыкчылыгы үчүн жергиликтүү бийликтин бул аракетин колдоп, өз салымыңызды кошууга чакырабыз!" - деди мэриянын маалымат бөлүмү.