Кыргызстанда өлүм жазасы болгонбу? Тарыхка карай...

Ысык-Көл облусунун Жети-Өгүз районундагы Барскоон айылынын 17 жаштагы тургуну Айсулуу 41 жаштагы жарандын колунан ажал тапкан соң, Кыргызстанда өлүм жазасын киргизүү сунушу бериле баштады.

Бул арада кыргызстандыктарды нес кылган окуяны өлкө башчысы Садыр Жапаров өз көзөмөлүнө алып, өлүм жазасын киргизүүнү караштыруу боюнча тапшырмасын койду.

Өлүм жазасы Кыргызстанда болгонбу?

- Кыргызстандын Баш мыйзамы өлүм жазасына тыюу салат.

- 1998-жылы ошол кездеги мамлекет башчысы Аскар Акаев Адам укуктарынын жалпы декларациясынын кабыл алынгандыгынын 50 жылдыгына карата өлүм жазасына эки жылдык мораторий киргизген. Анын мөөнөтү бир нече ирет жылдырылган.

- Акыркы өлүм жазасы 1998-жылы аткарылып, мыйзамды аткаруу атуу жолу менен жүргүзүлгөн.

- Өлүм жазасын жоюу жарлыгы мурдагы өлкө башчысы Курманбек Бакиев тарабынан 2007-жылы жарыяланып, 2010-жылдын декабрында Кыргызстан өлүм жазасын жоюуга багытталган Адам укуктары жана саясий укуктар боюнча эл аралык пакттын Экинчи факультативдик протоколун кабыл алган. Жаңы Жазык кодексинде өлүм жазасы өмүр бою эркинен ажыратуу менен алмаштырылган.

Жогорку Кеңеште да бул мыйзамды кайтарууну 2023-жылы эл өкүлдөрү сунуштаган. Бирок анда педофилдерди өлүм жазасына тартуу демилгеси көтөрүлгөн. Бирок Өкмөт депутаттардын бул аракетине каршылыгын билдирген.