Бишкекте Абдрахманов көчөсүндөгү мыйзамсыз курулуш токтотулду (фото)

Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Бишкек шаардык башкармалыгы тарабынан Абдрахманов көчөсү, 176 дарегинде текшерүү жүргүзүлдү. Бул тууралуу Курулуш министрлиги билдирди.

Маалым болгондой, текшерүүнүн жүрүшүндө көп кабаттуу үйдүн биринчи кабатында курулуш-монтаждоо иштери тиешелүү уруксат кагаздары жок жүргүзүлүп жаткандыгы аныкталды. Ошондой эле объектинин белгиленген тартипте багытын алмаштыруу (перепрофилирование) боюнча уруксат албагандыгы белгилүү болду. Мекеме бул нерсе шаар куруу нормаларынын бузуу болуп эсептеле турганын кошумчалады.

Натыйжада курулуш иштери токтотулуп, жооптуу тарапка Укук бузуулар жөнүндө кодекстин 144-беренесинин 3-бөлүгүнө ылайык 23 000 сом өлчөмүндө административдик айып салынды. Мындан тышкары бузулган эрежелерди жоюу жана тиешелүү документтерди тапшыруу боюнча көрсөтмө берилди.