Тышкы иштер министрлиги АКШда жашаган кыргызстандыктарга кайрылуу жасады

АКШда коммерциялык айдоочулук күбөлүктөрдү (CDL) берүү жана узартуу тартибин жөнгө салган жаңы эрежелер киргизилди. Бул тууралуу бүгүн, 1-октябрда Тышкы иштер министрлиги билдирди.

АКШнын Транспорт министрлигинин (DOT) жана Автотранспорттун коопсуздугу боюнча федералдык администрациясынын (FMCSA) расмий маалыматына ылайык, 26-сентябрдан тартып коммерциялык айдоочулук күбөлүктөрдү (CDL) алуу жана узартуу укугуна төмөнкүлөр ээ:

• жашыл карта ээлери (мыйзамдуу туруктуу жашоочулар)
• H-2A, H-2B, E-2 жумушчу визалары бар чет өлкөлүк жарандар

Мекеме жумушка орношууга уруксат документи (EAD) жана социалдык камсыздандыруу номери (SSN) болгонуна карабастан, тиешелүү иммиграциялык статусу жок жарандар мындан ары коммерциялык айдоочулук күбөлүктү (CDL) алууга же узартууга укугу жок экенин билдирди.

Ошондой эле CDL талап кылган транспорт каражаттарын башкаруу менен алектенген Кыргызстандын жарандарына аталган күбөлүктү алуу же узартууда мүмкүн болуучу кыйынчылыктардан сактануу үчүн документтеринин толуктугун алдын ала текшерүүнү сунуштады.