Орусияда 3 жашар кыз бассейнге чөгүп каза болду 

Орусиянын Адыгея аймагындагы туристтик курортто үч жашар кыз ачык бассейнде сууга түшүп жатып чөгүп кеткенин Орусиянын Тергөө комитетинин Telegram каналы билдирди.

Тергөөдө эс алуу жайынын жетекчиси эс алуучулардын, анын ичинде ачык бассейндеги коопсуздукту камсыздай албаганы аныкталган. Тергөө комитетинин маалыматы боюнча, куткаруучулар нөөмөттө турган эмес.

Бул факт боюнча Орусиянын Кылмыш-жаза кодексинин 238-беренеси (Керектөөчүлөрдүн коопсуздугунун талаптарына жооп бербеген кызмат көрсөтүү, байкабастыктан адам өлүмүнө алып келген) боюнча кылмыш иши козголду.

Учурда тергөө комитетинин кызматкерлери тарабынан далилдерди чогултууга багытталган тергөө амалдары жүргүзүлүүдө.