Путин: "Tomahawk ракеталарын Украинага берүү Орусия менен АКШнын мамилесин бузат"

Орусиянын президенти Владимир Путин АКШ президентинин администрациясы Украинанын армиясына узак аралыкка учуучу Tomahawk ракеталарын берүү чечимин кабыл алса, бул Орусия менен АКШнын мамилесинин бузулушуна алып келерин билдирди. Бул тууралуу орус басылмалары жазышууда.

Маалым болгондой, 2-октябрда Сочиде өткөн "Валдай" талкуу клубунун пленардык жыйынында Путин Tomahawk ракеталарын америкалык аскерлердин түз катышуусуз колдонуу мүмкүн эместигин айтып, мындай кадам жаңжалдын жаңы баскычына алып келерин, анын ичинде Орусия менен АКШнын ортосундагы чыңалууну күчөтөрүн белгилеген.

"Мен буга чейин эле айткам, бул биздин мамилелердин кыйрашына алып келет. Болгону акыркы убакта байкалган оң тенденциялар жокко чыгат. Ошондуктан мен эмне ойлосом, ошону айтып жатам. Бирок мындан ары эмне боло турганы бизден гана эмес, башка тараптардан да көз каранды", - деди Путин.