Германия Газа боюнча Трамптын планын ишке ашырууга жардам көрсөтүүнү сунуштады 

Германиянын тышкы иштер министри Йоханн Вадефуль АКШ президенти Дональд Трамптын Газадагы жаңжалды жөнгө салуу боюнча планын "өзгөчө мүмкүнчүлүк" деп атады. Ал бул демилгени тез арада ишке ашыруу үчүн эл аралык кызматташуунун маанилүүлүгүн баса белгиледи.

Катар менен Кувейтке болчу сапарынын алдында Йоханн Вадефуль журналисттерге берген маегинде араб жана мусулман мамлекеттеринин колдоосу менен Трамптын планы ийгиликке жете турганын айтты. Ал барымтадагыларды бошотууга жана согуштук аракеттерди токтотууга үмүт артарын белгиледи.

Министрдин айтымында, Израил менен ХАМАС керектүү кадамдарга даяр, бирок бул үчүн бардык кызыкдар тараптардын туруктуу кызматташуусу зарыл.

Германиянын тышкы иштер министри Кувейтте Перс булуңунун араб мамлекеттеринин кызматташтык кеңеши менен сүйлөшүүлөр жүргүзгөнүн да билдирди.

Вадефуль Германия бул пландын ишке ашуусунда негизги ролду ойной турганын, гуманитардык жардам жана калыбына келтирүү боюнча конкреттүү чараларды сунуштай турганын кошумчалады.