Тбилисиде оппозициянын нааразычылык акциясы кайрадан башталды

Тбилисиде кечээ, 5-октябрда оппозициянын нааразычылык акциясы кайрадан башталды. Митингге чыккандар Грузия парламентинин жанындагы Руставели проспектин тосуп алышты. Бул тууралуу Грузия-Онлайн басылмасы жазды.

Маалыматка ылайык, акцияга болжол менен миңге жакын киши катышып, Грузиянын, Евробиримдиктин жана Украинанын желектерин көтөрүшкөн. Полиция акцияга кийлигишкен жок.

Демонстранттар мурдагыдай эле жаңы шайлоо өткөрүүнү жана кармалгандарды бошотууну талап кылышууда. Грузиянын ИИМи мындай жыйындарды "бийликти кулатууга аракетинин уландысы" деп атады.

Бир күн мурун өлкөдө жергиликтүү шайлоо өтүп, анын фонунда Тбилисиде баш аламандык чыккан. Алты митингчи жана 21 полиция кызматкери жаракат алганын Саламаттык сактоо министрлиги билдирди.