Кытай Украинанын айыптоолоруна жооп берди

Кытайдын Тышкы иштер министрлиги Пекин орусиялыктарга Украинага ракеталык сокку уруу үчүн спутниктен маалымат берди деген айыптоого комментарий берди. Бул тууралуу УНИАН маалымат агенттиги жазды.

Министрликтин өкүлү мындай маалымат тууралуу өздөрүнө эч нерсе белгилүү эмес экенин айтып, Кытай Орусия–Украина согушуна карата "адилеттүү жана объективдүү позицияны" карманып келе жатканын билдирди.

"Бизде бул тууралуу эч кандай маалымат жок. Кытайдын "украиналык кризис" боюнча позициясы ар дайым ачык, калыс жана бейтарап болуп келген, бул эл аралык коомчулук тарабынан да таанылган",- деп айтылат ТИМ өкүлүнүн билдирүүсүндө.

Белгилей кетсек, 5-октябрга караган түнү Орусия Украинага абадан, деңизден жана жерден атылуучу ракеталар менен массалык сокку урган. Украина аба күчтөрү 496 "Shahed" жана башка типтеги дрондорду атып түшүргөн. Ошол маалда айрым маалымат каражаттары Батыш Украина үстүнөн, өзгөчө Львов облусунда, Кытайдын үч чалгын спутниги учуп өткөнүн билдиришкен. Алар чыныгы чалгын жүргүзгөндүгү же жүргүзбөгөнү азырынча белгисиз, бирок бул факт эл аралык тынчсыздануу жараткан.