Трамп Газадагы ок атышууну токтотуу боюнча жакшы сүйлөшүүлөр болгонун билдирди

АКШнын президенти Дональд Трамп Газа секторунда ок атууну токтотууга байланыштуу "абдан жакшы" сүйлөшүүлөр жүрүп жатканын билдирди. Бул тууралуу ал социалдык тармактагы баракчасына жазды.

Анын айтымында, өткөн дем алыш күндөрү ХАМАС жана бир катар өлкөлөр менен туткундарды бошотуу жана согушту токтотуу боюнча сүйлөшүүлөр ылдам ыргакта жүргөн.

Трамп тараптар дүйшөмбү күнү Египетте акыркы деталдарды тактоо үчүн кайра жолугарын айтып, ок атууну токтотуу келишиминин биринчи этабы ушул жумада бүтүшү керектигин белгиледи. Ал бардык тараптарды "тез аракет кылууга" чакырып, "убакыт маанилүү, болбосо көп кан төгүлөт" деди.

Эске салсак, 3-октябрда ХАМАС Трамптын Газа планы боюнча туткундарды алмашуу сунушуна макул болгонун билдирген. Трамп бул билдирүү ХАМАС туруктуу тынчтыкка даяр экенин көрсөтөрүн айтып, Израилди бомбалоону токтотууга чакырган.