Голливуд жылдызы Дайан Китон 79 жаш курагында дүйнө салды

Америкалык белгилүү актриса, “Оскар” сыйлыгынын лауреаты Дайан Китон кечээ, 11-октябрда Калифорнияда 79 жаш курагында каза болду. Бул тууралуу People журналы жазып чыкты.

Анын өлүмүнүн себептери азырынча расмий айтыла элек. Бирок PageSix булактарынын маалыматына караганда, актрисанын ден соолугу акыркы айларда начарлап кеткен.

Дайан Китон дүйнөгө белгилүү "Крёстный отец" тасмасындагы Кей Адамс жана "Энни Холл" тасмасындагы башкы ролу менен таанылган. "Энни Холл" фильми үчүн ал “Оскар” сыйлыгын утуп алган. Бир нече белгилүү кинолордо мыкты ролдорду жараткан.

Актриса 1946-жылы Лос-Анжелесте төрөлгөн. Карьерасын 1970-жылы баштап, кийинчерээк режиссёрлук иштерге да аралашкан. Ал тургай “Твин Пикс” сериалынын бир эпизодун тарткан жана 2021-жылы Жастин Бибердин "Ghost" клибине катышкан.

Дайан Китон турмуш курган эмес, бирок 1996 жана 2001-жылдары Декстер жана Дюк аттуу эки баланы багып алган.