Мадагаскар президенти аскерлер бийликти басып алууга аракет кылганын билдирди

Мадагаскар президенти Андри Радзуэлинанын администрациясы өлкөдө мыйзамсыз жана Конституцияга каршы бийликти басып алуу аракети болуп жатканын билдирди.

Билдирүүдөн бир нече саат өткөндөн кийин, CAPSAT деп аталган армиянын бөлүгү, тагыраагы, кадрдык жана административдик-техникалык кызматтар корпусу өлкөнүн аскер күчтөрүнүн жетекчилигин колго алганын жарыялады. Алар эми кургактагы, аба жана деңиз күчтөрүн толугу менен көзөмөлдөп жатканын билдиришти.

Кызыгы, дал ушул CAPSAT бөлүгү 2009-жылдагы саясий кризисте негизги ролду ойногон. Ал убакта дал ушул окуялардын натыйжасында Андри Радзуэлина бийликке келген эле.

Мадагаскарда нааразылык акциялары 25-сентябрда башталган. Башында эл суу жана электр жарыгынын өчүрүлүшүнө каршы чыкса, кийин бул нааразылык өкмөттүн жалпы ишине каршы кеңири демонстрацияларга айланган. Элди негизинен жумушсуздуктун жогору деңгээли, коррупция жана жашоонун кымбаттап кеткени нааразы кылууда.

Өткөн ишембиде кээ бир аскерлер борбор шаар Антананаривунун чет жакасындагы казармаларын таштап чыгып, мэриянын алдында митингге чыккан элге кошулуп кетишкен.

Ишемби күнү президенттик администрация билдирүү жасап, учурдагы президент Андри Радзуэлина жана ал өткөн жумада дайындаган жаңы премьер-министр Руфин Зафисамбо өлкөдөгү кырдаалды көзөмөлдөп жатканын билдирди.

Жекшембиде жарыяланган билдирүүдө президент Радзуэлина: "Азыркы тапта республика аймагында бийликти басып алуу аракети жасалууда, бул Конституцияны жана демократиялык принциптерди одоно бузуу болуп эсептелет", -деди ал.

Ал өлкөнү туруксуздаштырууга болгон ар кандай аракеттерди кескин айыптап, бардык маанилүү күчтөрдү конституциялык түзүлүштү жана улуттук эгемендүүлүктү коргоо үчүн биригүүгө чакырды.

Ошол эле күнү CAPSAT бөлүгү Фейсбуктагы билдирүүсүндө генерал Демосфен Пикуласты армиянын жаңы Башкы штаб башчысы катары дайындаганын жарыялады.

Жекшемби күнү эртең менен CAPSAT лагеринде жандармерия кызматкерлери сүйлөшүү үчүн келгенден кийин атышуу болгондугу тууралуу маалыматтар түшкөн. Бирок азырынча бул окуя боюнча толук маалымат жок.