Жети-Өгүз районунда "күйөөсүн өлтүргөн" деп шектелип Баатыр эне кармалды

Ысык-Көл облусунун Жети-Өгүз районунда 1958-жылы туулган аял "күйөөсүн өлтүргөн" деп шектелип кармалды. Бул туурасында Ысык-Көл ОИИБинин басма сөз кызматы билдирди.

Маалыматка караганда, үстүбүздөгү жылдын 15-январынан 16-январга караган түнү райондук ооруканага 1951-жылы туулган тургундун сөөгүн алып келишкен. Маркумдун аялы аны “чөптүн үстүнөн кулап түштү” деген. Бирок тергөөнүн жүрүшүндө окуя андай болбогону аныкталды. Милиция кызматкерлери үйдүн ичин кароого алышканда кандын издери бар үстөл табылган. Маркумдун аялын жакшылап суракка алышканда, ал күйөөсүн өлтүргөнүн мойнуна алган. 

Анын айтымында, 15-январь күнү күйөөсү экөө арак ичип отуруп, бир саамдан соң уруш чыгып кеткен. Мындан улам кылмышка шектүү маркумду бөлмөдөгү үстөл менен бир нече жолу башка чапкан. Айта кетсек, айыпталып жаткан жаран Баатыр эне болгон. Учурда тергөө иштери жүрүүдө.