Мексикада тропикалык бороон-чапкындардан 44 адам каза тапты

Мексикада тропикалык "Присцилла" жана "Реймонд" бороондорунан улам келип чыккан суу ташкындары жана жер көчкүлөрдүн кесепетинен кеминде 44 адам каза болду. Бул тууралуу Reuters агенттиги кабарлады.

Мексиканын өкмөтү кырдаалды "өзгөчө кырдаал" деп жарыялап, жабыркагандарга жардам берүү үчүн армияны мобилизациялады.

Бир нече күнгө созулган нөшөрлүү жаан-чачын Мексиканын борбордук жана чыгыш аймактарында оор кесепеттерге алып келди. Расмий маалыматтарга ылайык, Веракрус штатында 18 адам, Идальго штатында 16 адам, Пуэблада 9 адам, жана Керетародо 1 адам каза болгон.

Президент Клаудия Шейнбаумдун өкмөтү 139 жабыркаган шаарга жардам көрсөтүү боюнча атайын план ишке киргизди.

"Биз Веракрус, Идальго, Пуэбла, Керетаро жана Сан-Луис-Потоси штаттарындагы өзгөчө кырдаалга көңүл буруп жатабыз. Губернаторлор жана федералдык органдар менен тыгыз кызматташуудабыз. Улуттук өзгөчө кырдаалдар комитети тынбай иш алып барууда", — деп жазды Шейнбаум социалдык тармактагы билдирүүсүндө.

Мексиканын Коргоо министрлиги кырдаалдын алдын алуу үчүн 5400дөн ашык аскер кызматкерин жөнөттү. Алар кооптуу аймактардан адамдарды эвакуациялоого, кырдаалды көзөмөлдөөгө жана жабыркаган райондорду тазалоого жардам берип жатышат.