Казакстанда биринчи жолу никеге мажбурлоо боюнча кылмыш иши козголду

Казакстанда биринчи жолу "никеге мажбурлоо" үчүн кылмыш иштери козголду. Бул тууралуу казакстандык басылмалар жазышты.

Маалым болгондой, 16-сентябрда Кылмыш-жаза кодексине никеге турууга мажбурлоо үчүн жоопкерчиликти караган 125-1-берене киргизилген. Анын ичинде кыз ала качуу же күч колдонуу менен коркутуп, турмушка чыгууга мажбурлоо учурлары да бар.

Бул үчүн айып пул, оңдоо иштерин жүргүзүү, эркиндигин чектөө же эки жылга чейин эркинен ажыратуу түрүндө жаза каралган. Эгерде аракеттер оор кесепеттерге алып келсе, мөөнөт беш жылдан он жылга чейин болушу мүмкүн.

"Никеге турууга мажбурлоо фактылары боюнча биринчи кылмыш иштери Шымкентте жана Кызылорда облусунда катталды. Белгилей кетчү нерсе, эки учурда тең жабырлануучулар жашы жете электер", - деп билдирди Башкы прокуратура.