Мамдуманын төрагасы Орусиядан 8 айда 35 миң мигрант чыгарылганын билдирди

5-февралдан бери миграциялык мыйзамдарды бузган 35 миңге жакын чет элдик жаран Орусиядан чыгарылды. Бул тууралуу Мамлекеттик Думанын төрагасы Вячеслав Володин билдиргенин орус басылмалары жазышууда.

Анын айтымында, көзөмөлгө алынган мигранттардын реестри ишке киргенден кийин мыйзамсыз жүргөндөрдүн саны 1-сентябрга карата 770 миң адамга жеткен. Алардын үчтөн бири аялдар жана балдар.

Володин мыйзамсыз жүргөн мигранттар өлкөдөн өз эрки менен чыгып кетиши керектигин эскертип, чыгуу датасын, багытын жана жайын алдын ала билдирүүнү талап кылды. Болбосо алар депортацияланып, 5 жылга Орусияга кирүүгө тыюу салынат.

11-октябрдан тарта мыйзамсыз жүргөн мигранттарга үйлөнүүгө, ажырашууга, балдарын мектеп же бала бакчага жайгаштырууга, айдоочулук күбөлүк алууга, автоунаа башкарууга жана банктык эсеп ачууга тыюу салынды.

Мындан тышкары Володин эмгек мигранттарын үй-бүлөсүн Орусияга алып келбөөгө чакырды.