Бишкектеги жер сатууга байланыштуу Ноокаттын акими кармалды

Бишкек шаарында ири жер тилкелерин мыйзамсыз сатууга шектелип Көк-Жар айыл аймагынын мурдагы айыл өкмөт башчысы, учурда Ош облусунун Ноокат районунун акими Ч.Э. жана ири жер үлүштөрүнүн ээлери О.С., Ж.Т аттуу жарандар кармалды.

Шаардык милициянын басма сөз кызматы билдиргендей, аларга карата Кылмыш-жаза кодексинин 336-беренеси (“Коррупция”) менен кылмыш иши коголду.

Тергөө иш-чараларынын жүрүшүндө Ч.Э. жогоруда аталган адамдар менен алдын ала сүйлөшүп, ири жер үлүштөрүн мыйзамсыз түрдө майда тилкелерге бөлүп, жеке турак жай курулушу үчүн саткан.

Мындан улам, Көк-Жар айыл аймагынын №172 контурунда мыйзамсыз турак жай курулуштары массалык түрдө жүргүзүлүп, электр мамычалары орнотулуп, суу түтүктөрү тартылып жана жолдорго шагыл төшөлгөн. Бул мыйзамсыз курулуштардын кесепетинен айдоо жерлердин кыртышына олуттуу зыян келтирилип, мамлекетке 2 миллиард сомдон ашык көлөмдө материалдык чыгым алып келгендиги аныкталды.

Азыркы учурда кылмышка шектүү Ч.Э. ушул сыяктуу дагы бир нече фактыларга тиешеси бар экендиги аныкталып, тергөө амалдары улантылууда.

Жогорудагы кылмыш иши боюнча жалпысынан 12 адам кылмыш жоопкерчилигине тартылып, соттун чечими менен камакка алынган. Учурда тергөө иштери жүрүп жатат.

Ош облусунун Ноокат районунун учурдагы акими Эмил Чакибаев, ал ушул жылдын март айында кызматка дайындалган.