АКШ Венесуэла жээгине жакын жайгашкан кемеге сокку урду

АКШ Венесуэла жээгинде жайгашкан маңзат ташуучу жана террорчулук менен байланыштуу болгон кемеге сокку жасады. Бул операция Пентагондун башчысы Пит Хегсеттин буйругу менен жүргүзүлгөн. Бул тууралуу АКШ президенти Дональд Трамп Truth Social социалдык тармагында билдирди.

Трамптын айтымында, чалгындоо кызматы бул кеме маңзат ташып бара жатканын жана ал мыйзамсыз наркотеррордук тармактарга тиешелүү экенин тастыктаган. Ал эл аралык сууларда жок кылынган. Сокку натыйжасында кемеде жүргөн алты адам жок кылынган, ал эми АКШ күчтөрү жоготууга учураган эмес.

2025-жылдын август айында New York Times басылмасы Трамп Пентагонго Латын Америкасындагы маңзат картелдерине каршы аскердик күч колдонууга уруксат берген жашыруун буйрукка кол койгонун жазган. Андан кийин АКШ Венесуэла жээктерине 4,5 миң аскери менен жети кеме жөнөткөн. Бул кадамга жооп кылып, Венесуэла президенти Николас Мадуро улуттук мобилизация жарыялаган.

Сентябрдан тарта АКШ Венесуэлага тиешелүү деңиз кемелерине ракета соккуларын ура баштаган. Октябрдын башында дагы бир кеме эл аралык сууларда жок кылынган. АКШ бийлиги Венесуэладагы маңзат картелдерин "далилденген наркотеррористтер" деп атап, аларды АКШнын улуттук коопсуздугуна жана тышкы саясатына коркунуч катары мүнөздөгөн.

Венесуэла БУУнун Коопсуздук кеңешине кайрылып, АКШнын аракеттерине кийлигишүүнү суранган.