Мессинин Испаниядагы мүлкүндө мыйзам бузуулар аныкталды

Испаниядагы Ибица аралынын бийлиги футбол жылдызы Лионель Мессинин 2022-жылы 11 миллион еврого сатылып алынган люкс вилласын иликтөөнү баштаганын чет элдик басылмалар жазып чыгышты.

Маалыматтарга караганда, аталган объект аралдагы өзгөчө корголуучу жаратылыш зонасында жайгашкан. Ал жерде курулуш иштерине чектөөлөр коюлган. Объектти текшерүүдө жертөлөсүндө уруксат берилбеген жайлар, анын ичинде гараж жана баштапкы пландарга кирбеген кошумча бөлмөлөр табылган.

Бул мыйзам бузуулардан улам муниципалитет расмий түрдө вилланы жашоого таптакыр жараксыз деп тапкан. Футболчуга жакын булактардын айтымында, бардык мыйзамсыз иштерди мурунку кожоюну жүргүзгөн. Месси сатып алуу учурунда аны билген эмес. Бирок испан бийликтери мыйзам бузууларды олуттуу деп атап, аларга чара көрүүнү талап кылууда. Антпесе вилла жарым-жартылай бузулушу мүмкүн.