Аравандагы өрт чыккан базардын сатуучу: "Миллион сомдук товарым күйүп кетти" (фоторепортаж)

Бүгүн, 17-январда Араван районундагы мөмө-жемиш базарынан өрт чыты. Жергиликтүү тургундардын айтымында, өрт саат 06:20да башталган. Кырсык катталган жайга өрт өчүрүүчүлөр 06:55те келишкен. Жабырлануучу Алымжанов Мурадылдын бир миллион сомдук товары күйүп кеткен. "Бул базарда таттууларды сатып иштечүмүн. Бир миллион сомдук товарым бар болчу. Эртең менен келсем, базардын абалы бул болуп калыптыр",- дейт ал.

Ал эми ӨКМнын Ош облусу боюнча жетекчиси Жаныбек Назирович буларга токтолду: "Бизге саат 06:50дө чакыруу түштү. Аравандын өзүнөн бир жана Оштон эки өрт өчүрүүчү машина келип, өрттү өчүрүштү. Өрт базардын баш жагынан башталгандыктан, сатуучулар товарлардын 50-60 пайызын алып чыгып кеткенге үлгүрүштү. Өрттүн тез арада күйүп кетишинин бирден-бир себеби, базар пластикалык жабдуулар менен курчалган экен. Ошон үчүн да өрттү өз убагында өчүрүүгө мүмкүнчүлүк болбоду".

Бул окуя боюнча Ош, Араван жана Кара-Суу боюнча экология жана техникалык коопсуздук башкы адиси Гуламидин Базарбаевге кайрылганыбызда, ал "Экология жана техникалык коопсуздук боюнча регионалдык башкы башкармалыгынан 2013-жылдын октябрь айында ушул мөмө-жемиш базарынын сатуучуларына электр жабдууларын туура пайдалануу боюнча түшүндүрүү иштери жүргүзүлгөн болчу. Тилекке каршы, өрткө жол берилип олтурат" деп билдирди.

Учурда өрттүн келип чыгуу себеби аныкталууда.