БУУ: "2025-жылы дүйнөлүк гуманитардык муктаждыктардын 21 пайызы гана чогултулган"

Бириккен Улуттар Уюму 2025-жылы глобалдык гуманитардык муктаждыктар үчүн 45,3 миллиард долларлык жардам чакырыгынын сентябрь айынын аягына чейин болгону 21 пайызы гана (9,6 миллиард доллары) алынганын билдирди. БУУнун башкы катчысынын орун басары Фархан Хак күндөлүк маалымат жыйында билдиргендей, жылдын аягына үч ай калганда, глобалдык гуманитардык муктаждыктардын төрттөн биринен азы гана каржыланган.

Өткөн жылдын ушул мезгилине салыштырмалуу бул көрсөткүч 40 пайыздан ашык төмөндөгөнү белгиленди. Хак фонддун жетишсиздиги миллиондогон адамдарга олуттуу кесепеттерди алып келерин, адамдар медициналык кызматтардан, үй-бүлөлөр тамак-аштан жана балдар билим алуудан ажырап калганын белгиледи.

Ал ошондой эле буга байланыштуу Ооганстанда быйыл 420дан ашык саламаттык сактоо мекемелери жабылганын, Сомалиде августта 1,1 миллион адамга азык жардам берилсе, ноябрда бул сан 350 миңге түшөрүн, Бангладеште жарым миллион балдар билим алуудан ажырап калганын мисал кылып, гуманитардык жардамды көбөйтүүгө чакырды.