"Чикатилонун айынан 11 киши күнөөсүз атылган". Өлүм жазасы бир катар баскычтар менен каралышы керектиги айтылды

Мурдагы өкмөт башчы Феликс Кулов "Биринчи радиого" берген маегинде өлүм жазасы кирсе, ал бир катар баскычтарда каралышы керектигин айтты.

"Биринчи сот присяжных (ред.: элдик сот арачы) деген карашы керек. Ачык айтканда, азыр сот системасына эл ишенбейт. Ошондуктан элдик сот уюштурулса, ага белгилүү, көз карандысыз 10 адам келсе, анда эл ишенет. Андан кийин соттук баскычтардан өтүп, президенттик комиссия карайт. Мына ушундай тутумду киргизиш керек", - деди ал.

Ошондой эле маек кургандардын бири, милициянын отставкадагы полковниги Сагын Өмүралиев Куловдун пикирин колдоп, күнөөсүз адамдар өлүм жазасына тартылып калышы мүмкүн экенин билдирди.

"СССРде Андрей Чикатило деген маньяк болгон. Ал 57 адамды, көбүнчө аялдарды өлтүргөн. Ошонун айынан күнөөсү жок 11 адам атылып кеткен. Ошон үчүн бир же үч сот өкүм чыгарбастан, 10 же 12 киши баарын угуп, анан кийин чечим чыгарышы керек", - деди ал.

Буга чейин ЭлТР телеканалы Айсулууну өлтүрүүгө шектелип кармалган Кумарбек тууралуу жарыялаган материалда шектүүнү Чикатилого салыштырган. Анда Кумарбектин буга чейин жасаган кылмыштары ачыкталат.

Айта кетсек, Баш мыйзамга өлүм жазасын киргизүүнү сунуштаган мыйзам долбоору коомдук талкууга коюлган.