Трамп чалгындоо кызматына Венесуэлада жашыруун операция жүргүзүүгө уруксат бергенин тастыктады

АКШ президенти Дональд Трамп Борбордук чалгындоо башкармалыгына Венесуэлада жашыруун операцияларды жүргүзүүгө уруксат бергенин тастыктады. Бул тууралуу чет элдик басылмалар жазышты.

Анын айтымында, Ак үй наркокартелдерге каршы соккуларды деңизде гана эмес, кургакта да жасоо мүмкүнчүлүгүн карап жатат. Адистер бул билдирүү Вашингтондун Венесуэла президенти Николас Мадурого болгон басымын кыйла күчөткөнүн көрсөтүп жатканын айтышууда.

New York Times гезити шейшемби күнү өз булактарына таянып жазгандай, Трамп чалгындоо кызматына Венесуэлада операцияларды өз алдынча же ири аскерий аракеттердин алкагында жүргүзүүгө уруксат берген.

Трамп чалгындоо кызматын Венесуэлага жөнөтүүгө уруксат бергенинин эки себеби бар экенин билдирген.

Анын биринчи себеби Венесуэладан АКШга кылмышкерлер келип жатканын айтса, экинчи себеп катары өлкөгө маңзаттардын агымын көрсөткөн.

"Венесуэладан көп сандагы маңзаттар келип жатат. Алардын көбү деңиз аркылуу ташылат. Азыр кургактагы жолдорду караштырып жатабыз, анткени деңизде биз толук көзөмөл орнотконбуз", — деп кошумчалаган Трамп.

Трамп чалгындоо кызматын Мадурону бийликтен кулатуу аракеттерине катышуусу мүмкүн экенин айткан жок. Бирок New York Times гезитинин маалымат булактары анын администрациясынын жашыруун стратегиясы дал ушул максатты көздөйт деп билдиришкен.