Казакстандык авиакомпания Астана–Бишкек багыты боюнча түз каттам ачат

Казакстандык Qazaq Air авиакомпаниясы Астана шаарынан Бишкек жана Самарканд багыттары боюнча жаңы эл аралык түз каттамдарды ачарын билдирди. Бул тууралуу авиакомпаниянын басма сөз кызматы кабарлады.

Түз каттамдар 7-ноябрдан тарта ишке кирет. Анда Астана – Самарканд – Астана багыты жума жана жекшемби күндөрү, ал эми Астана – Бишкек – Астана багыты дүйшөмбү жана бейшемби күндөрү болот.

Qazaq Air авиакомпаниясынын башкы директору Адилбек Умралиевдин айтымында, бул каттамдар Борбор Азиядагы өлкөлөр ортосундагы ишкердик, туристтик жана маданий кызматташтыкты өнүктүрүүгө өбөлгө түзөт.

"Астана, Самарканд жана Бишкек шаарларынын ортосундагы түз аба каттамдар жүргүнчүлөргө ыңгайлуулукту камсыздап, аймактагы байланыштарды чыңдоого шарт түзөт. Бул багыттар саякатчылар, ишкерлер жана студенттер үчүн жаңы мүмкүнчүлүктөрдү ачат", — деди Умралиев.

Мындан тышкары жаңы каттамдар аркылуу жүргүнчүлөр Астана аркылуу Омск, Новосибирск, Бишкек жана Самарканд шаарларына да туташ рейстер менен уча алышат.