Ош облустар аралык ооруканасында мурда болбогон жаңы медициналык жабдык орнотулду

Ош облустар аралык бириккен клиникалык ооруканасында мамлекеттик-жеке менчик өнөктөштүктүн алкагында бөйрөк жана заара каналдарындагы таштарды талкалап чыгаруучу заманбап литотриптор аппараты орнотулуп, колдонууга берилди.

Мекеменин маалыматы боюнча, буга чейин мындай аппарат мамлекеттик медициналык мекемелерде болгон эмес.

"Ош шаарында литотриптор аппараты менен иштеген бир гана жеке менчик клиника бар эле. Эми болсо бул жаңы медициналык жабдык аркылуу бейтаптар жогорку сапаттагы медициналык кызматты мамлекеттик деңгээлде ала алышат. Аппараттын ишке кириши менен бейтаптарга кызмат көрсөтүү бир кыйла ыңгайлуу жана жеткиликтүү баада болот. Бул жаңылык калк үчүн медициналык жардамдын сапатын жакшыртууга жана ден соолукка байланыштуу чыгымдарды кыскартууга өбөлгө түзөт", - деп белгиленген маалыматта.