Сирия Орусия менен аскердик база жана Башар Асад боюнча сүйлөшүүлөрдү жүргүзүүдө

Сирия менен Орусия мурдагы Сирия президенти Башар Асаддын өкмөтү менен түзүлгөн келишимдерди кайра карап чыгуу боюнча сүйлөшүүлөрдү жүргүзүп жатышат. Бул тууралуу Сириянын тышкы иштер министри Асаад аш-Шибани билдиргенин Asharq Al-Awsat басылмасы жазды.

Сүйлөшүүлөрдө Сирия аймагында жайгашкан орус аскердик базалары боюнча маселелер каралган, бирок азырынча жаңы келишимдер түзүлө элек. Ошондой эле тараптар 2024-жылы бийликтен кулатылган Башар Асаддын тагдыры жана эки өлкөнүн ортосундагы талаштуу маселелерди жөнгө салуу боюнча мындан аркы кызматташтык мүмкүнчүлүктөрүн да талкуулашкан.

Сириянын убактылуу президенти Ахмед аш-Шараа 15-октябрда Москвага келип, Орусия президенти Владимир Путин менен жолугушууда жаңы сириялык бийлик Орусия менен болгон бардык мамилелерди жаңылоо ниетинде экенин айткан.

Кремлдин басма сөз катчысы Дмитрий Песков да сүйлөшүүлөрдө орус аскердик базалары тууралуу маселе көтөрүлгөнүн ырастаган, бирок кенен маалымат берген эмес.

Түркиянын Тышкы иштер министрлигиндеги булактарга ылайык, Сириянын өтмө өкмөтү Орусиядан аскердик-техникалык жардам сурап, анын ордуна Сирия аймагындагы орус аскердик объектилеринин сакталышына кепилдик берген.