Манас шаарында көп кабаттуу турак үйгө инженердик текшерүү жүргүзүлдү

Жер титирөөгө туруктуу курулуш жана инженердик долбоорлоо мамлекеттик институту тарабынан Манас шаарындагы көп кабаттуу турак үйгө инженердик текшерүү жүргүзүлдү. Бул тууралуу Курулуш министрлиги билдирди.

Маалыматка ылайык, текшерүү Роза Азимова көчөсү, 53 дарегиндеги "Азия Стиль Плюс" ЖЧКсы тарабынан салынган А, Б, В, Г блокторунан турган 9 кабаттуу турак жайга карата уюштурулду. Иш-чаранын максаты аталган объекттин курулуш ченемдериндеги шайкештигин жана сейсмикалык туруктуулугун аныктоо болуп саналат.

Натыйжада объект боюнча бардык техникалык документтер изилденип, объекттин конструкциялык схемасы, элементтердин өлчөмдөрү алынат. Ошондой эле зарыл болгон чиймелерин түзүү, кемчиликтердин жана бузулуулардын пайда болуу себептерине талдоо жүргүзүлөт.

Текшерүүнүн жыйынтыгында институт тарабынан курулуш конструкцияларынын техникалык абалы боюнча корутунду даярдалып, аларды мындан ары пайдалануу боюнча сунуштар иштелип чыгат.