Э️шатов: "Кыргызстанда күйүүчү май боюнча кырдаал курч, бир айга жетпейт"

️Кыргызстанда күйүүчү май боюнча кырдаал курч. Бул тууралуу 20-октябрда Spuntik радиосунун эфиринде Нефтетрейдерлер ассоциациясынын төрагасы Канат Эшатов билдирди.

Эшатовдун айтымында, күйүүчү май запастары бар, бирок алардын деңгээли кыйла төмөндөдү. Азыркы учурда компаниялардын бир айлык запастары бар, балким, андан да аз болушу мүмкүн.

Мурда уюмдар запастарды узак мөөнөткө сактай алышкан, бирок азыркы кырдаалда, дүң соода токтоп, жеткирүүлөр чектелүү болгондуктан, ири компаниялардын запастары тез эле түгөнүп баратат.

"Майда дүң соода токтогондо, май куюучу жайда иштеген чакан жеке фирмалар жана жеке ишкерлер көйгөйлөргө туш болуп, чийки заттын жетишсиздигинен улам ишин токтотушат. Чоң компаниялар да запастардын кыйла азайышына дуушар болуп жатышат",- деп түшүндүрдү ал.

Эшатов азыркы шартта рынокту турукташтыруу үчүн альтернативдүү булактарды издөөнүн зарылдыгына көңүл бурду.