"Диплом берем деген". Жалал-Абад мамлекеттик университетинин окутуучусу алдамчылыкка шектелип кармалды

Манас шаарында Жалал-Абад мамлекеттик университетинин педагогикалык факультетинин К.З. аттуу окутуучусу системдүү түрдө алдамчылык кылууга шектелип кармалды. Бул туураулу бүгүн, 21-октябрда Улуттук коопсуздук мамлекеттик комитетинен билдиришти.

Маалым болгондой, кармалган жаран кызматтык абалынан пайдаланып абитуриенттерди адаштырып, сырттан окуу бөлүмүнө тапшыртып, андан соң экзамендерди ийгиликтүү тапшыртуу менен мамлекеттик үлгүдөгү диплом берем деп убада кылганы аныкталган.

Кызмат көрсөтүүлөрү үчүн алдамчы мезгил-мезгили менен жабыр тарткандардан окуу акысын төлөө жана семестрлерди "жабуу" үчүн акча алып турган.

Мекемеден билдиришкендей, учурда тергөө тарабынан кармалган окутуучунун акыркы 5 жыл ичинде жасаган ушул сыяктуу 50дөн ашык алдамчылык фактысы аныкталды.

УКМКнын Жалал-Абад облусу боюнча башкармалыгы К.З.нын иш-аракеттеринен жабыркаган жарандар болсо (0322) 5-60-49 жана (0556) 06-18-83 телефондору аркылуу кайрылууну суранат.