Бишкекте дизайн-код боюнча иретке келтирүүнүн экинчи этабы башталат (фото)

Шаар куруу жана архитектура департаментинин Бишкек шаар куруу жана архитектура башкармалыгы "Бишкек шаарынын дизайн-коду" эрежелерин ишке ашыруунун алкагында турак жайлардын фасаддарына текшерүү жүргүзүлүп жатат. Бул тууралуу Курулуш министрлиги билдирди.

Маалым болгондой, эми дизайн-кодду ишке ашыруунун экинчи этабы башталат.

Экинчи этаптын алкагында:

• турак жай батирлеринин сырттагы кондиционер блоктор;
• фасаддарга жайгаштырылган интернет жана электр зымдар;
• өз алдынча айнектелген балкондор;
• уруксатсыз орнотулган кошумча конструкциялар боюнча иретке келтирүү иштери жүргүзүлөт.

Белгилей кетсек, дизайн-код боюнча интернет зымдары сыртка чыкпай иреттүү жайгаштырылып, кондиционерлер терезенин жанына орнотулушу керек. Ал эми балкондорго кошумча курулуш жүргүзүлбөшү шарт.

Курулуш министрлиги борбор калаанын тургундарынан жашаган турак жайларын Бишкек шаарынын дизайн-кодунун талаптарына ылайык иретке келтирүүгө чакырат.