Словакиянын премьер-министрине ок чыгарган жазуучу 21 жылга эркинен ажыратылды

Словакияда 72 жаштагы жазуучу жана саясий активист Юрай Цинтула премьер-министр Роберт Фицого ок чыгарган окуяда терроризмге айыпталып, 21 жылга эркинен ажыратылды. Бул тууралуу Reuters агенттиги кабарлады.

Соттун чечими боюнча, Цинтуланын максаты өкмөттүн ишине тоскоолдук кылуу болгон, ошондуктан ал терроризм боюнча күнөөлүү деп табылган.

Адвокаттар жаза жеңилирээк болуусу үчүн Цинтуланы терроризм эмес, мамлекеттик кызматкерге кол салуу беренеси боюнча күнөөлүү деп таанууну суранышкан. Бирок сот мындай дооматтарды четке каккан.

Цинтула өз көрсөтмөсүндө Фицону өлтүргүсү келбегенин айткан.

2024-жылдын 15-майында Юрай Цинтула премьер-министр Роберт Фицого бир нече жолу ок аткан. Фицо оор абалда ооруканага жеткирилген жана бир нече операция жасалган. Цинтула окуя болгон жерде кармалган. Ал бул аракетин бийликтин саясаты жакпаганы менен түшүндүргөн.