Чүйдөн келген 100дөн ашык окуучу "Евразия" паркына барышты (сүрөт)

Чүй облусунан келген 100дөн ашык окуучу Кыргызстандагы эң ири үй-бүлөлүк эс алуу багы болгон "Евразия" паркы менен таанышты. Мындай иш-чараны "Евразия Кыргызстан" уюмунун аймактык кеңсеси уюштурду.

Ага 5–8-класстардын 100дөн ашуун окуучусу катышты. Аларга "Евразиялык лицей" программасынын алкагында "Евразия" автономиялык коммерциялык эмес уюму тарабынан берилген жаңы мектептик автобустар менен жеткирүү уюштурулду.

Иш-чаранын негизги максаты — активдүү жана таланттуу окуучуларды шыктандыруу, ошондой эле аймактын ар кайсы бурчунан келген окуучулардын ортосунда тажрыйба алмашуу жана достук байланыштарды түзүүгө шарт түзүү.

Мында катышуучулар ар түрдүү аттракциондордо ойноп, цирктин шоусун көрүштү. Ошондой эле бири-бири менен баарлашуу мүмкүнчүлүгүнө ээ болушту. Көпчүлүк окуучулар үчүн бул биринчи жолу уюштурулган иш-чара болуп, аларга жаңы таасирлерди жана жаркын эмоцияларды тартуулады.

Бул долбоор фонддун билим берүү тармагын колдоого жана активдүү жаштардын өнүгүүсүнө багытталган системалуу ишинин бир бөлүгү болуп саналат. «Евразия Кыргызстан» уюмунун өкүлдөрү мындай иш-чаралар окуучулардын социалдык активдүүлүгүн, демилгелүүлүгүн жана командада иштөө көндүмдөрүн өнүктүрүүгө өбөлгө түзөрүн, ошондой эле аймактагы билим берүү мекемелеринин ортосунда өнөктөштүк байланышты чыңдоого жардам берерин белгилешти.

Фонд алдыда Чүй облусунда гана эмес, бүткүл Кыргызстан боюнча окуучулар үчүн билим алуу, баарлашуу жана өзүн-өзү өркүндөтүү мүмкүнчүлүктөрүн кеңейтүүгө багытталган программаларды улантууну пландап жатканын баса белгиледи.