The Telegraph: Лавров менен Рубионун сүйлөшүүсүнөн кийин Путин менен Трамптын саммити токтотулду

Орусиянын президенти Владимир Путин менен АКШнын президенти Дональд Трамптын Венгрияда болуучу саммити эки өлкөнүн тышкы иштер министрлери, тагыраагы, Сергей Лавров менен Марко Рубионун ортосунда чыңалуу менен өткөн телефондук сүйлөшүүдөн кийин токтотулду. Бул тууралуу The Telegraph басылмасы жазды.

Макалада айтылгандай, Орусия жана АКШ дипломаттары 20-октябрда байланышкан. Журналисттердин айтымында, алардын сүйлөшүүсү ийгиликсиз өткөн. Айрым басылмалар Лавров бул сүйлөшүүдө Москва азыркы фронттук линия боюнча согушту "тоңдуруу" сунушуна макул эместигин Рубиого билдиргенин жазышууда.

16-октябрда Путин менен Трамп телефон аркылуу сүйлөшүп, Венгрияда бетме-бет жолугушуу өткөрүүгө макулдашкан. Кремль билдиргендей, бул сүйлөшүү эки жуманын ичинде же андан кийин өтүшү мүмкүн болчу.

Ал эми 21-октябрда CNN телеканалы кабарлагандай, АКШ менен Орусиянын тышкы саясат боюнча жетекчилери сүйлөшкөндөн кийин АКШнын расмий өкүлдөрү Москва Украина боюнча өзүнүн "максималисттик талаптарынан" баш тартууга даяр эмес экенин айтышкан.