Улуу Британия Газа боюнча келишимдин аткарылышын көзөмөлдөө үчүн Израилге аскерлерин жөнөттү 

Улуу Британия АКШнын өтүнүчү менен Газа секторунда ок атышууну токтотуу келишимин көзөмөлдөөгө жардам берүү үчүн Израилге жогорку даражадагы аскер кызматкерин жана чакан аскердик контингентти жөнөттү. Бул тууралуу Sky News басылмасы жазды.

Маалыматка ылайык, Улуу Британиянын коргоо министри Жон Хили бул тууралуу 20-октябрда Лондондо бизнес өкүлдөрүнүн алдында коргонуу темасындагы лекциядан кийин билдирген.

Анын айтымында, аты аталбаган британ офицери АКШ тараптан дайындалган командирдин орун басары болуп иштейт. Бул командир жарандык жана аскердик координация борборуна жетекчилик кылат, ал эми бул борборго Египет, Катар, Түркия жана Бириккен Араб Эмираттарынан да аскерлер катышары күтүлүүдө.

"Улуу Британия мүмкүн болгон жерде өз тажрыйбасы жана көндүмдөрү менен жардам берип, маанилүү роль ойнойт. Биз лидер болууну көздөбөйбүз… бирок өз үлүшүбүздү сөзсүз аткарабыз",- деди коргоо министри Жон Хили.

АКШ болсо Израилге 200гө чейин аскер жиберүүнү пландоодо, бирок алар Газа секторуна киришпейт.

Sky News кошумчалагандай, буга чейин Улуу Британиянын тышкы иштер министри Иветт Купер Улуу Британия Израилге аскер жиберүүнү пландабай турганын билдирген.

Эске салсак, акыркы күндөрү Израил менен палестиналык ХАМАС кыймылы ок атышпоо келишимин бузду деп бири-бирин айыптап жатышат. Өткөн дем алыш күндөрү Израил аба соккуларын кайра жандандырган.

Газанын Саламаттык сактоо министрлиги 20-октябрда билдиргендей, акыркы сутка ичинде 50дөн ашуун адам каза болгон.