АКШ Тынч океандагы баңгизаттарын ташуучу кемеге сокку урду

АКШнын коргоо министри Пит Хегсет Тынч океандын чыгыш бөлүгүндө баңгизат ташыган кеменин жок кылынганын билдирди.

Reuters агенттигинин маалыматына караганда, бул окуя АКШнын президенти Дональд Трамп жарыялаган баңги соодасына каршы күрөшүү боюнча кампаниянын алкагында Тынч океанда жүргүзүлгөн алгачкы аскердик операция болуп саналат.

"Бул кеме мыйзамсыз баңгизат ташууга катышкан, белгилүү баңгизат транзиттик маршруту менен жүрүп бара жаткан жана баңгизат жүктөп алган",- деп билдирди Пит Хегсет.

Бирок агенттиктин тактоосуна ылайык, министр өз айткандарын документалдык далилдер менен бекемдеген эмес.

Буга чейин АКШнын аскерлери Кариб деңизинде кемелерге каршы кеминде жети жолу сокку урганы кабарланган. Америкалык чалгын кызматтарынын маалыматы боюнча, бул кемелер баңгизат ташууга пайдаланылган.

АКШ сентябрь айынын башынан тарта ушундай операцияларды жүргүзүп келет. Ошол эле учурда Сенат Пентагондон соккулардын негиздемесин түшүндүрүүнү талап кылып, президент Дональд Трамптын наркокартелдерди террористтик уюм катары таануу чечимин жетишсиз деп эсептөөдө.