Бишкекте техникалык коопсуздук эрежелерин бузган компаниянын иши токтотулду

Курулуш министрилигине кечээ, 22-октябрда Бишкек шаарынын Симферопольский 8 дарегинде жайгашкан курулуш объектинде техникалык коопсуздук эрежелери сакталбай жаткандыгы маалымдалган. Бул тууралуу министрликтин басма сөз кызматы кабарлады.

Маалыматка ылайык, курулуш объектине толук текшерүү жүргүзүлүп, административдик чаралар көрүлдү.

"Нур Имарат Курулуш" ЖЧКсы тарабынан көп кабаттуу турак үй салынып жаткан объектте үчүнчү жактар үчүн коопсуз зона каралган эмес. Ошондой эле, эмгек коопсуздугунун талаптары жана курулуш ченемдери бузулгандыгы аныкталган.

Натыйжада, аныкталган мыйзам бузуулар жоюлганга чейин курулуш-монтаждоо иштери убактылуу токтотулду. Мындан сырткары, акт түзүлүп, протоколдун негизинде айып пул салуу токтому чыгарылды.

Эгер курулуш объектиндеги иштер курулуш ченемдерине жана талаптарына ылайык жүргүзүлбөй жаткандыгы аныкталса Курулуш министрлиги тарабынан тиешелүү чаралар сөзсүз көрүлөт деп айтылды.