Германияда аскердик машыгуу учурунда полиция жаңылыш ок чыгарып, 1 аскер жаракат алды

Германиянын Мюнхен шаарынын түндүк-чыгышындагы Алтенердинг аймагында өткөн "Маршал күчү – 2025" аскердик машыгуусу маалында полиция менен аскерлер кокустан ок атышты. Бул тууралуу чет элдик басылмалар жазышты.

Маалыматтарга караганда, коомдук жайда машыгуу өткөрүп жаткан аскерлерди жергиликтүү тургундар көрүп, полицияга "күмөн жараткан куралчан адамдар бар" деп билдиришкен. Окуя болгон жерге келген полиция кызматкерлери машыгууга катышкан аскерлерди реалдуу коркунуч катары кабылдаган. Ал эми аскерлер полицияны машыгуунун бир бөлүгү деп ойлоп, окууга арналган үйрөтүүчү октор менен аткан. Буга полиция кызматкерлери чыныгы ок менен жооп кайтарган.

Окуянын натыйжасында бир аскер жеңил жаракат алып, ооруканага жеткирилди. Анын өмүрүнө коркунуч жок экени билдирилди. Немис басылмалары полицияга бул машыгуу тууралуу алдын ала кабарланбаганын жазышты. Машыгуунун максаты өлкөгө коркунуч жаралган учурда аскердик жана жарандык түзүмдөрдүн биргелешип аракеттенүү мүмкүнчүлүгүн өнүктүрүү болгон.